Studio Arti

Ali Sinani dhe dimensionet e fshehura të jetës

Xhemal Ahmeti

St. Galen, 3 qershor (05) – Si «lirike dhe asociative» e quan artin e piktorit Ali Sinani të lindur në Dobërdoll të Maqedonisë, gazeta më e madhe e Zvicrës Lindore «St. Tagbaltt». Ekspozita e pedagogut të diplomuar në Akademinë e Arteve të Shkupit u hap javën që shkoi në Galerinë e njohur moderne «Letzte Laterne» (Fenerët e fundit) të St. Gallenit. «Në veprat e mia dua që të krijoj lidhshmëri ndërmjet spektrit tim për realitetin dhe ndjenjave të mia», thotë ai para mediave dhe «veprat e mia synojnë udhëheqjen e përjetuesit të saj në dimensione të fshehura të jetës dhe natyrës».

«Përderisa disa nga pikturat e vajit reflektojnë qetësi dhe harmoni, tek të tjerat eksplodon bota ndiesore e piktorit», thotë kritiku zviceran i arteve Andreas Schütz që me punimet e piktorit shqiptar për herë të parë është njohur gjatë vitit 2002 në Galerinë e Arteve në Rorshahershtrase të po të njëjtit qytet. Sa i përket stilit të tij ai na thotë: «ka ditur të hyjë mirë në botën e artit abstrakt. Na i prezanton ngjyrat me gjithë magjinë dhe bukurinë e tyre pa pasur nevojë të na manipulojë me ndonjë objekt, domethënë pa pasur fare objekt. E re dhe e suksesshme në këtë kontekst është aksioni që figurat gjeometrike, ose «kubizmat» nuk janë Tema e punimit por vetëm prapaskena e tyre, kështu që ngjyrat vazhdojnë të kenë pushtetin e tyre absolut në vepër».

Në të vërtetë kemi të bëjmë me një student shembullor të shkollës së orfistëve «të cilët besojnë se ashtu si muzika që nuk imiton vetëm zhurmën e natyrës, por komponohet nga tingujt dhe zëri ashtu ndodhë edhe me pikturën që e krijojnë format dhe ngjyrat», thotë redaktorja e revistës frankofone «Agjenda e artit» Maria Nanty. Dhe në pikturën e Ali Sinanit ngjyrat dhe format (kryesisht ilustrative e sekondare) janë alfa dhe omega e veprës së tij.

Klikoni mbi foto për ta hapur ose shkarkuar Katalogun e punimeve
të ekspozuara në Galerinë "Die Schwelle" në St. Gallen, 2009.