Studio Arti

Edhe një ekspozitë e pavarur e piktorit Ali Sinani

Ditë më parë në Galerinë “ Die Schwelle” të St. Galenit të Zvicrës u hap ekspozita e 5- të e pavarur e piktorit akademik Ali Sinani, me prejardhje nga fshati Dobërdoll i Maqedonisë dhe me banim në Zvicër. Ai në vitin 2002 ka diplomuar në akademinë e artit në Shkup në degën e pikturës, ndërsa tash është në përgatitje të magjistraturës që sivjet do ta mbrojë në Muzeun e Arteve në Shkup.

Ali Sinani në Zvicër ka qenë pjesëmarrës në disa ekspozita kolektive me autorë shqiptarë e zviceranë. Në mesin e shpërblimeve ka fituar edhe çmimin “Agim Ramadani” për pikturë. Ai ka studion e tij të artit “Studioi-arti” në qytetin e St. Gallenit. Kësaj radhe në ekspozitën me titullin: “Arti asociativ dhe abstrakt", kishte ekspozuar më se 20 punime në pëlhurë, ndër të cilat një kushtuar një të afërmi, Denisit që vdiq në moshë të re, e të cilin e kishte titulluar “D 17”.

Në hapje të ekspozitës, pos piktorit Nexhmedin Jonuzi, kryetar i Shoqatës së Artistëve Figurativë Shqiptarë në Zvicër dhe skulptores Sadëka Pajaziti, merrnin pjesë edhe shkrimtarët Shefqet Dibrani e Albert Rama dhe dashamirë të tjerë të artit. Për veprat e tij, Ali Sinani thotë se: «Në veprat e mia dua që të krijoj lidhshmëri ndërmjet spektrit tim për realitetin dhe ndjenjave të mia, ndaj edhe ato synojnë udhëheqjen e përjetuesit të saj në dimensione të fshehura të jetës dhe natyrës”.

«Përderisa disa nga pikturat e vajit reflektojnë qetësi dhe harmoni, tek të tjerat eksplodon bota ndiesore e piktorit», shton kritiku zviceran i arteve Andreas Schütz, i cili vlerëson lartë punimet e këtij piktori shqiptar.

Ekspozita e Ali Sinanit që gjendej në afërsi të stacionit të trenit në St. Galen qëndroi e hapur një muaj të plotë.


Foto e teksti: Rexhep Rifati


Momente nga hapja e ekspozitës së Ali Sinanit në St. Galen: