Studio Arti

Ballafaqimi me të panjohurën

“Dimensionet e fshehura të jetës”, është titulli i ciklit prej tetë punimesh me të cilat u prezantua piktorit akademik, Ali Sinani, në ekspozitën e përbashkët me artistë të ndryshëm nga Evropa, në Galerinë Nordstrasse në Cyrih.

Piktorit akademik Ali Sinani, me prejardhje nga fshati Dobërdoll i Maqedonisë (diplomuar në akademinë e artit në Shkup), me banim në St.Gallen, padyshim hynë në radhën e piktorëve të suksesshëm shqiptar në Zvicër. Me punimet e tij ai është dukshëm i pranishëm me ekspozita personale e kolektive, madje me artistë mjaft eminent zviceranë e autorë të tjerë që jetojnë në këtë vend. Në këtë kuadër, më 4 qershor bashkë me piktoret, Ursula Franguiadakis,, Silvia Jelitto, Zeljka Bratoljic-Melkay (e cila e shpalli të hapur ekspozitën në fjalë), Luana Sacchetti, Melanie Ramella dhe Gisela Zimmermann po merr pjesë në një ekspozitë të përbashkët.

Ishte kjo ekspozita e dhjetë kolektive, me artistë të ndryshëm nga Evropa, me emërtimin: “Ëndrra dhe realiteti” në Galerinë Nordstrase në Cyrih, ku në mesin e disa autorëve u ekspozuan edhe 8 punimet e Ali Sinanit. Gjatë hapjes solemne të kësaj ekspozite, me prani të artdashësve zviceran e një numri të vogël shqiptarësh, zhvilluam një dialog me këtë piktor, tashmë prezent në qarqet kulturore zvicerane.


Me ç`punime, elemente e tematika paraqitet kësaj here piktori Ali Sinani?

Kësaj radhe prezantohem me 8 piktura vaj në pëlhurë, me motive nga jeta e përditshme, me emërtimin: ”Dimensionet e fshehura të jetës”, ku këto motive jam munduar që gjatë pikturimit, sipërfaqen e pikturës ta paraqes në aspekt estetik, sa më inspirativ, me perspektivë dhe në vijën përfundimtare sa më të përsosur. Ndërsa elementet që i paraqes në punimet e mia mundem t’i definoj abstrakte-asociative, sepse si bazë mundohem të hetohet një lehtësi dhe freski në kolor, ngjashëm siç janë treguar edhe në natyrë


Ndërsa sa i përket ideve dhe motiveve, cilat janë ato?

Ideja nxit guximin e krijuesit për tu ballafaquar me të panjohurën dhe për ta njohur atë më mirë, ku dhe si duhet ta njohë realitetin e veprës. Veprat përmes motiveve: ”Realja figurative”, synoi të sjellë dimensionet e fshehura të jetës përmes abstraktes dhe asociatives, pasi veprat e mia janë kompozime formash dhe ngjyrash si rezultat logjik i ndryshimit të konceptit të vlerës artistike, ku vlera nuk lidhet me subjektin por me formën dhe ngjyrën, ku arrij t’i shpreh ndjenjat e brendshme, vuajtjet shpirtërore, vrazhdësinë e jetës apo shpresën e fshehur për t’i dhënë fund të keqes dhe për t’i përballur të gjitha këto sfida njerëzore që janë pjesë e kompozimeve strukturore të kërkimit ornamental të ngjyrës. Ku bazë është vizatimi që i siguron krijuesit një konstruksion të fortë dhe ku përmes ngjyrës arrij botën e dëshirave.


Po inspirimin,ku e mbështet dhe si e shpreh atë në pëlhurë?

Inspirimi që vjen nga pikturat e mia hapin çështje që kanë të bëjnë me psikologjinë e punimeve sesa me vet artin ku shprehi gjendjen shpirtërore – gëzimin, gjendjen gazmore të cilën e reflektojnë pikturat, ku mënyra e ndërtimit të ngjyrës, gjithashtu është tipar dallues dhe plotësues i të shikuarit, pasi ato sjellin koloritin e kategorisë së ngjyrës paqësore, që buron nga thellësia e shpirtit.

Në veprat e mia dua të krijoj lidhshmërinë ndërmjet spektrit tim për realitetin dhe ndjenjave të mia, ndaj edhe ato synojnë në udhëheqjen e përjetuesit të saj në dimensionet e fshehura të jetës dhe natyrës.


Sa i përket kritikës,ç’do të veçoje nga ato që kanë shkruar autorët e huaj?

“Përderisa disa nga pikturat në vaj reflektojnë qetësi dhe harmoni, tek të tjerat eksplodon bota ndjesive e piktorit, Ali Sinani”, ka potencuar gjatë një prezantimi, kritiku zviceran i arteve Andreas Schütz.

Teksti e fotot: R. Rifati